FIT

ARCHIF news

Laura y ellen vËnc l titul provinziel, Alessia ie vizecampionËssa!

Ntan l’ena dai 25 de mei nchin ai 2 de juni à la lia dl tennis de Maran metù a jì i campionac provinziei de singuler per la categories mutans y mutons sota 10, 11 y 12 ani y la surans Laura y Ellen Mair se à segurà l titul sota 10 y 11 ani, Alessia Piccoliori ie deventeda vizecampionëssa U10.
Dla bona forma dla jëuna atletes dl TC S. Cristina/Sëlva che vën alenedes da Stefano Bassetto y Patrick Prader se ovan bele ntendù l’ena dant ulache Laura ova venciù l turnoi FIT Under 10 metù a jì dal TC Bauzanum y Ellen chël sota 12 ani. Y a Maran iela mo n iede jita scialdi bën. Pra la mutans sota 10 ani à Laura batù n iede Markart Aileen te doi set a nul, cun l medem punteje al pona arjont la finela vencian contra Sophie Tappeiner, la finela ie stata duta ladina danter Laura y si cumpania de scuadra y de alenamënt Alessia Piccoliori ulache Laura à venciù per 6 a 1 y 6 a 2. Alessia ova batù te si prim juech Greta Zwerger per 6 a 4 y 7 a 6 y dadedò Vickie Trocker per 6 a 4 y 6 a 0. Drëtan bën iel jita per Ellen Mair che ie deventeda campionëssa provinziela batan n iede Nadja Höller te doi set tleres a nul, pona Larissa Tschenett per 6 a 2 y 6 a 3 y te finela Marion Viertler te trëi set cumbatui per 7 a 5, 2 a 6 y 6 a 4. Cumplimënt ala trëi prumetënta jugadëures y nce a duc i autri jëuni che se alenea truep y che arà dessegur vel blota sodesfazion ntan la sajon da d’instà cun truep turnoies sun l program.

Verena y JONAS VËNC L MASTER!

Per finé via la sajon dla serie de turnoies de tennis per l Raiffeisen Tennis Grand Prix 2011 iel mo unì metù a jì l master a Bulsan, n turnoi ulache possa fé pea i primes ot tlassifichei de uni categoria. Cun chël de Jonas Ciechi pra i mutons sota 14 ani iel ruvà l terzo titul te Gherdëina daujin a chëi venciui da Verena Hofer tla categories U14 y U 16 pra la mutans.

Perdrët dova l turnoi bele finé dan n valguna enes, ma mpue per l stlet tëmp y mpue per d’autri mpënies ie la finela stata spusteda tan inant che pra i mutons U14 l’an fat n sada, ai prim d’utober sun i ciamps de tiera cuecena a S. Cristina. Chësc ie stat mesun ajache i doi concurënc fova tramedoi atlec che se alenea cun l maester Stefano Bassetto, Jonas Ciechi de Urtijëi y Michael Kerschbaumer de Persenon. Te na partida drët valiva che ie fineda via te trëi set per 7 a 5, 4 a 6 y 6 a 4 do ntëur n doi ëura de juech à "John" pudù se ralegré per la vënta contra si cumpani de alenamënt. Bele n lunesc, ai 26 de setëmber ova Verena Hofer batù Vera Ploner a St. Georgen te Puster te doi set per 6 a 4 a y 7 a 5 vencian la categoria U14, l di do se ala davanià l titul pra la U16 for contra Vera Ploner a Urtijëi per 6 a 3 y 6 a 0.

Verena À l ticket per MiamI!

L 2011 ie stat n ann plën de suzesc per la jëuna tenista Verena Hofer de Urtijëi che do avëi venciù l titul naziunel Under 14 ai 11 de setëmber se fej sie nce l titul pra l „master naziunel U14“ dl Nike Junior Tour se cualifican per l master mundiel che sarà de dezëmber a Miami tl Florida.

Scebën che n ne possa aldò dl nuef regulamënt dla federazion taliana de tennis niarujené de n master à i respunsabli dl zircuit NJT, che mët a jì chësta sort de campionat te bën 31 nazions sëur dut l mond, mpo ulù ti dé la puscibltà ai atlec che à fat pea pra plu tapes y à arjont na posizion danter i primes ot tla tlassifica generela de se ancunté n trëi dis alalongia per n event contlusif. Pra la mutans sota 14 ani fova perchël muetes doi jugadëures de Südtirol, Vera Ploner y Verena Hofer, tlassifichedes respetivamënter al prim y segondo post dl ranking, per jì dai 23 nchin ai 25 de setëmber a Torino per la „tennis clinic Nike“. Y propi la doi atletes sudtirolejes ie states bones ala fin dl turnoi de ruvé sun i scialieres plu auc y inò n iede à Verena Hofer abù la sëuravënta batan la „pustra“ te finela te trëi set per 6 a 3, 2 a 6 y 6 a 0. De dezëmber jirala perchël a Miami per se cunfrunté cun la „miëura atletes dl mond“ che à venciù l master naziunel te si stat, obietif che Verena se ova arjumà l’ann passà perdan te finela, ntlëuta fossa l master mundiel stat sun la Bahamas.

na finela ladina al bauzanum

Dai 4 nchin ai 14 de setëmber à la lia dl tennis Bauzanum metù a jì l’ultim turnoi de tennis che fej pert dl zircuit Raiffeisen Tennis Grand Prix 2011 reservà ala categories 3-4NC, la partezipazion ie stata dastramp granda cun ndut 116 scric ite pra i ëi. Y propi te chësta cumpetizion ie doi atlec de Gherdëina ruvei te finela se seguran nscila nce n bon post per l master che unirà fat tla proscima enes.

L se tratova de n turnoi cun tabelons a selezion ulache i jugadëures à n iede da se museré cun tennisc de medema tlassifica per se culifiché pona per l tabelon prinzipel. Y l ie nce da di che l livel de juech fova scialdi bon cun ndut 9 jugadëures de terza categoria. Danter chisc nce Patric Prinoth (tlassificà 3.3) y David Kostner (tlassificà 3.4) dl Tennis Club S. Cristina/Sëlva che fova metui un tla pert auta y l’auter tla pert bassa dl tabelon. Per David ie l turnoi pià via cun na vënta te doi set per 6 a 4 y 6 a 4 contra Mirko Holzner (tlassificà 4.2), dadedò al fermà cun l medem punteje Jacopo Agosti y batan Florian Morandell (tlassificà 3.2) te na semifinela scialdi trata te trëi set per 6 a 2, 2 a 6 y 6 a 4 se al davanià de ruvé te finela. Tla pert dessot ie Patric Prinoth pià via a var plënn vencian l prim juech contra l cualificant Matthias Galeazzi (tlassificà 4.2) te doi set per 6 a 3 y 6 a 1, 7 a 5 y 6 a 3 ie pona stat l resultat cun chël che l à mandà a cësa David Botti (tlassificà 3.4). Te semifinela l aspitova Matteo Bonvicini (tlassificà 4.1), ma nce l jugadëur de Bulsan ne n’ie nia stat bon de fermé l atlet ladin che se à merità la vënta te doi set cun l punteje de 6 a 4 y 8 a 6 tl tie-break dl segondo set. L fova l prim iede che i doi cumpanies ie garatei un contra l’auter te na finela de terza categoria y la jënt che fova a cialé pro se à dassënn devertì a udëi l bon livel de juech che i doi mustrova. David piova via cun gran druch vencian l prim set per 6 a 2, ma Patric fova bon de reagì y se fé sié l segondo set tl tie-break a 6. Tl terzo muciova pona David danora per 5 a 2 y la partida semiova destineda a finé tosc. Ma sciche l suzed suvënz tl tennis ie mo Patric stat bon de raidé l juech vencian ala fin per 7 a 5 y purtan a cësa si segondo titul de chëst’ann. Per tramedoi n bel suzes che ti permët a Patric de se plazé al prim y a David al terzo post tla tlassifica generela dl zircuit de chësta serie de turnoies y per chël apuntamënt ulons ti mbincé mo dut l bon.

Verena Hofer campionËssa taliana under 14 2011

Che Verena fova te na grandiscima forma ovela bele desmustrà ntan l’enes dan i campionac taliani U14 stac a Parma dai 6 ai 11 de setëmber vencian sibe l turnoi Open de Persenon sciche nce chël de Limone sun l Garda. Ma cialan al tabelon di campionac taliani semiovel che n ëssa propi ulù ti fé la streda drët ërta per ruvé inant nchin te finela. Ti cherc de finela ovela da se cunfrunté cun la numer 1 dl tabelon che fova te chël mumënt nce rateda la numer 1 de si ann te Europa, Fiona Ferri che spilnea tla Franzia. Y propi te chësta partida venciuda te doi set per 6 a 3 y 6 a 4 se ala splanà la streda che la à ala fin purteda nchin te finela. Ma dant, te semifinela ala messù bater Francesca Brancato cun chëla che la ova perdù i doi cunfronc dant. Chësta partida ie fineda te doi set cun l resultat de 7 a 5 y 6 a 4. Te finela pona à Verena trat ora duta si energies fajan a na maniera che si aversera ne pudëss nia vëncer si terzo titul talian ndolauter: la jëuna tennista de Lucca tla Toscana, Jessica Ferri, na atleta scialdi cumpleta, bona tecnicamënter y nce atleticamënter messova ala fin ti lascé la vënta a na Verena che à veramënter dat l’anima te dut l juech, te dut l turnoi. Do che Verena ova venciù l prim set per 6 a 3 ti fova la toscana muceda danora per 3 a nia; ma cun la solita cunzentrazion, decision y mentalità sterscia iela stata bona de raidé l juech a si vantaje y do feter n’ëura y mesa de juech à Verena pudù auzé n puni (te si maniera omla nchin al’autëza de na cuessa) n sëni de "vittoria del titolo italiano". N grandiscimo cumplimënt a Verena per chësc resultat storich per l sport te Südtirol y dantaldut te Gherdëina che ie tl lëur de crëscer dassënn. Speron che la vede inant te chësc ritm y ..... for cun i piesc sun fonz. De gra ai alenadëures Stefano Bassetto y Patrick Prader ma nce a duc si cumpanies che se alenea cun Verena, y pona nce n cumplimënt ai genitoresc Inge y Ambros che la sustën for y te uni situazion. Brava y for inant nscila, tu y duc ti cumpanies tennisc!!!!!!!!!!!


N VALGUNA FOTOGRAFIES pra i campionac taliani a parma dai 6-11.09.2011

PATRICK PRADER, CAMPION D’ITALIA DE DOPL Y DE SINGULEr

L trainadëurs y ex-jugadëur prufescionist Patrick Prader à venciù cun merit l titul talian pra i campionac naziunei de segonda categoria. Tl singuler iel stat bon de bater damprovia Moncagatto Francesco (62-61), pona Teodori Federico (62-63), ti otaves de finela Raffelli Federico (60-36-61), ti cherc de finela Nicola Ghedin (60-61), te semifinela Tarallo Stefano (62-75) y n dumënia, ai 4 de setëmber Piccari Francesco (64-46-62). Si gran mumënt à Patrick nce desmustrà tl dopl che ël à venciù deberieda cun si cumpani Matthias Wolf. Avëi te nosta lia n trainadëur de n tel livel ie sambën zeche de straordiner y perchël iel da ti fé n gran cumplimënt.

CHI FËRMA PA Verena Hofer?

Verena Hofer crësc sëura se nstëss ora y va a vëncer si terzo titul te n turnoi Open de chëst’ann. N di do si cumplì di 14 ani se fejela sie l titul pra l turnoi de Limone sun l lech dl Garda batan te na finela duta ladina Greys Moroder. Do che Greys ova venciù l prim set per 6 a 1 ie la jëuna tennista de Urtijëi stata bona de raidé la partida vencian l segondo set 6 a 3 y pona l terzo cun l punteje de 6 a 4. Cungratulazion a tramedoves.

Verena Hofer fej l bis, patrick prader Ënghe!!

Avisa doi enes do che la jëuna tennista de Urtijëi ova purtà a cësa si prim titul da Dossobuona te provinzia de Verona à Verena Hofer desmustrà mo n iede che la ie madura per la segonda categoria vencian l turnoi „Open Zità de Persenon 2011“.
Nia da crëier cun cie segurëza y frëidëza che la atleta de trëdesc ani smerdla ite te chëla codles metan sota prescion averseres che resultea sun l papier miëures de deplu categories. Tl turnoi de tennis a Persenon à Verena batù damprovia Vera Ploner, pona la 2.5 Katy Agnelli y te finela pona Giorgia Vitale tlassificheda 2.8. Chësta ultima partida ie fineda via te prësciapuech n’ëura de juech te doi set  per 6 a 1 y 6 a 4 y povester na „man de fai“ da pert dla tennista ladina. Cumplimënc iel nce da ti fé a Patrick Prader che à venciù la categoria di ëi a Persenon. L ex-jugadëur prufescionist  lëura dal’autonn de l’ann passà nca sciche maester deberieda cun Stefano Bassetto per l T.C. S. Cristina/Sëlva y ël cëla de se tenì for n forma fajan pea vel turnoi. Patrick Prader à batù n iede Andrea Grazioso, pona Christian Larcher y te finela ti al cunzedù iust n pont per set a Alex Vittur.

SÜDTIROLPOKAL

L campionat a scuadres

Sciche uni ann à nosta lia scrit ite truepa scuadres a fé pea l campionat de Südtirolpokal tla categories ëiles y ëi, mutans y mutons under, over y serie D. >>

CIAMPS A S. CRISTINA

3 ciamps de tiera cuecena

Tl 1990 ie unì fac i ciamps de tennis a S. Cristina tl Zënter Iman. Da ntlëuta à la lia dl tennis n gestion chësta nfrastrutura che resta davierta ntan l instà.

CIAMPS CURÌI TE SËLVA

2 ciamps curìi "Bross slide"

Dal prim d’utober 2010 à l TC S. Cristina/Sëlva sëurantëut la doi plazes da tennis tl tennis curì te Sëlva ta Isgla. Tlo iel 2 ciamps de tepih cun granulat de gumi.

SERVISC DE NCURDÉ

Cordes rotes?

Nosta lia à na mascin prufesciunela per tré ite cordes. Nosc cumpani Roman ie a disposizion per chësc servisc, ël à nce da garat d′uni sort de cordes.

TURNOIES


Turnoi UNDER - 20-28.08.11

Chëst′ann metons a jì n turnoi reservà ala categories di pitli, i under 10, 12, 14 y 16. L’apuntamënt da nuté su ie dai 20 nchin ai 28 de agost.

TC S. CRISTINA/SËLVA • Zënter Iman - 39047 S. Cristina | VAL GARDENA-GRÖDEN | SÜDTIROL
tel. 0471 793525 • fax 0471 790689 • email: info@tennius.it | Nr. P. IVA IT01735550210 | IMPRESSUM